جميع المقالات

الأعراض والحالات

غضروف الرقبة | الأعراض ومتى نناقش الجراحة؟

شكوى شائعة · قالوا لي عندك غضروف في الرقبة. الغضروف نفسه مش مرض، هو وسادة طبيعية بين فقرتين. المهم: هل بيضغط على عصب أو على النخاع الشوكي؟

إعداد مركز ميكروسباين · مراجعة طبية: د. محمد نوار

هل يمكن أن يكون ألم الذراع من الرقبة؟

قد يمتد ألم غضروف الرقبة إلى الكتف والذراع، وقد يصاحبه تنميل في بعض الأصابع أو ضعف في الذراع أو اليد. يراجع الطبيب توزيع الأعراض وقوة العضلات والإحساس ويقارن ذلك بنتيجة التصوير عند الحاجة. إذا ظهر ضعف جديد أو متزايد، أو صارت الكتابة أو إغلاق أزرار القميص أصعب، أو ظهر اختلال جديد في المشي أو التوازن، اطلب تقييمًا طبيًا عاجلًا.

هل كل بروز في الرنين محتاج علاج؟

لأ. فيه فرق بين انزلاق غضروفي طبيعي وانزلاق مرضي. الطبيعي بروز بسيط بيحصل مع التقدم في السن ومبيضغطش على الأعصاب، فمش محتاج علاج. أما المرضي فهو بروز كبير بيضغط على الأعصاب أو النخاع.

عشان كده بنقارن مكان البروز في الرنين بالأعراض والفحص. ولو هتعرض حالتك على مختص، خد معاك صور الرنين نفسها مش التقرير بس. والأفضل رنين مغلق بقوة ١٫٥ تسلا على الأقل لوضوح الصورة.

إمتى العلاج التحفظي، وإمتى الجراحة؟

العلاج التحفظي هو الالتزام بالتعليمات والتمارين مع العلاج الدوائي. ويقدّر د. نوار أن نحو ٩٥٪ من حالات غضروف الرقبة بتتحسن بكده.

بنفكر في استئصال الغضروف بالميكروسكوب لما يكون الغضروف كبير ومعاه:

  • ضغط شديد على النخاع الشوكي أو بداية كدمة فيه، أو ضعف في الذراعين أو الرجلين، أو ضعف في التحكم في البول. الجراحة هنا عاجلة لمنع عجز دائم.
  • ألم في الذراع بيمنعك من حياتك الطبيعية ومابيستجيبش للعلاج لمدة ٣ شهور.

والحقن والتردد الحراري؟

دي بتسكّن الألم لفترة بتخدير العصب، لكن مش بتشيل الغضروف الضاغط. بتتعمل في حالات محددة، لما التخدير الكلي مش مناسب، والقرار للطبيب المعالج بعد فحص دقيق. وفي وجود ضغط على النخاع أو ضعف بالأطراف مينفعش نأخر العلاج المناسب.

إيه الفرق بين الدعامة العادية والدعامة المتحركة؟

بعد إزالة الغضروف بيتحط مكانه بديل بين الفقرتين: قفص (Cage) من مادة PEEK، وجواه عظام صناعية لحد ما الفقرتين يلتحموا. دي الدعامة العادية، وهي اللي ما زالت الحل المعتمد في غضروف الرقبة.

فيه كمان الدعامة المتحركة (الغضروف الصناعي)، بدأ استخدامها سنة ٢٠٠٤ عشان تحافظ على قدر من الحركة بين الفقرات، وبتناسب حالات مختارة. وحسب خبرة د. نوار، الدعامة العادية بتدي نتيجة أثبت لمعظم مرضى غضروف الرقبة، ولذلك هي اختيارنا الأساسي في المركز.

إمتى الرقبة الطبية، وإمتى أرجع شغلي؟

الدعامة محتاجة من شهرين لـ٣ شهور عشان تلتحم بالفقرتين، ولذلك بنوصي بالرقبة الطبية حوالي شهرين، نهارًا وأثناء النوم، وممكن تتشال لفترات قصيرة للتنضيف أو لتغيير الجرح.

الجراحة بفتحة صغيرة في الجلد لا تتجاوز ١٫٥ سم. بعد حوالي ساعتين من العملية بتبدأ تقعد وتقف وتمشي. وتقدر ترجع لشغل مكتبي بعد أسبوعين، وللشغل البدني الشاق وللرياضة بعد شهرين.

اعرف الخطوات من استئصال الغضروف العنقي بالميكروسكوب.

شرح بالفيديو

الانزلاق الغضروفي العنقي الضاغط على النخاع الشوكي